दलसिंह गिरी

मंसिर २७ कालिकोट/कर्नालीमै पहिलो पटक कालिकोटमा घितोपत्रबारे जनचेतना अभिबृद्धि सम्बन्धि अभिमुखीकरण भएको छ । नेपालका विभिन्न आयोजना तथा वित्तिय लगानीमा कर्नाली क्षेत्रका बासिन्दाहरुको न्यून सहभागिता देखिएकाले धितोपत्रका बारेमा कर्नाली क्षेत्रका बासिन्दाहरुलाई अभिबृद्धि गराउन अभिमुखीकरण गरिएको हो ।

नेपाल धितोपत्र बोर्ड र उद्योग बाणिज्य संघ कालिकोटको संयुक्त आयोजनामा जिल्ला सदरमुकाम मान्ममा आज आयोजित धितोपत्र सम्बन्धि जनचेतना अभिबृद्धि कार्यक्रम गरिएको छ । नेपाल धितोपत्र बोर्डका अध्यक्ष डा. हिक्मत बहादुर कार्कीको नेतृत्वमा कालिकोट आएको टोली द्धारा उद्योग बाणिज्य संघ कालिकोटका अध्यक्ष सूर्य बहादुर शाहीको अध्यक्षतामा संचालन गरिएको अन्तरक्रिया कार्यक्रममा नेपाल धितोपत्र बोर्डका उपनिर्देशक अम्बिका प्रकाश गिरीले धितोपत्रको परिचय, यसको महत्व र यसको कामबारे कार्यक्रमका सहभागिहरुलाई जानकारी गराउनु भएको छ । 

अन्तरक्रियामा धितोपत्रबारे गरिएको जानकारी पश्चात सहभागिहरुले राखेको जिज्ञासा मेटाउदै नेपाल धितोपत्र बोर्डका अध्यक्ष कार्कीले कर्नालीमा लगानी गर्ने क्षेत्रमा अथाहा सम्भावना भएपनि यहाको स्थानीय समुदाय जागरुक नदेखिएकाले धितोपत्रबारे जिल्लावासीलाई जनचेतना जगाउन यो कार्यक्रम आयोजना गरिएको बताउनु भएको छ । कर्नालीमा जडिबुटी, पर्यटन तथा जलविद्युतको अथाहा सम्भावना भएकाले अब यहाँकै समुदायले आफ्नै लगानीमा आयोजना संचालन गरी आर्थिकरुपमा समृद्ध हुन सकिने कार्कीले बताउनु भयो । 

कर्नाली क्षेत्रमा परापूर्व कालदेखि सम्पती ब्यापक भएपनि यसको आम्दानीमुलक प्रयोगको कमिका कारण पैसा घरको भित्ता, मुदुस, बाकस र जमिनमा राख्ने चलन यदाकदा अझै कायम रहेको बताउदै यसलाई सहि सदुयोग गरी लगानी गर्न सके कर्नालीकै विकास हुने कार्कीले बताउनु भएको छ । प्रमुख जिल्ला अधिकारी कृष्ण कुमार खड्काको प्रमुख आथित्यता, जिल्लामा कृयाशिल राजनैतिकदल, सरकारी कार्यालयका प्रमुख प्रतिनिधि, नागरिक समाज, पत्रकार, स्थानीय ब्यापारीहरुको उल्लेख्य उपस्थीति रहेको छ ।