साउन ५, काठमाडौँ । सुन ल्याउने तस्करहरुले तीन महिनाको अवधिमा एकै मात्रामा २९ पटकसम्म 'ब्रेक सु' विमानस्थल भन्सार कार्यालयबाट नेपाल भित्र्याएको पाइएको छ । हङकङबाट आउने अटो पार्ट्स भनि लेखिएको कार्गो शनिबार त्रिभुवन अन्तर्राष्ट्रिय विमानस्थलको भन्सार कार्यालयबाट बाहिरिएपछि राजश्व अनुसन्धानले भेटेको थियो । त्यसपछि भएको अनुसन्धानको क्रममा सुन तस्करीको धेरै रहश्य खुल्दै गएको छ ।

रेडी ट्रेड प्रा.लि. नामको कम्पनीको नाममा आएको मोटरसाइकल र स्कुटरको १६० सेट ‘ब्रेक शु’ ८ वटा प्याकेटमा थियो । अनुसन्धानको क्रममा एउटा ब्रेक शु बाहेक सबैमा सुन भेटिएको छ । ब्रेक सुमा रहेको सुनको मात्रा कति छ जोख्न बाँकी छ । राजश्व अनुसन्धान अधिकारीहरुले सामात्नु अघि उक्त 'ब्रेक सु' शंका लागेर खोलेर समेत हेरेको बताइएको छ । तर भन्सार अधिकारीहरुले नचिनेको बताइएको छ । 

यसअघि यहि कम्पनीले उही परिमाणमा सुन तस्करी गरेको आशंका छ । अनुसन्धानको लागि भन्सार विभागका अधिकारीहरु समेत तानिने भएका छन् । सामान्य २१ बर्षीय मजदूरको नाममा २९ चैत २०७९ मा कम्पनी खोलि उक्त कम्पनीको नाममा २९ पटकसम्म कार्गो आयात भएको र त्यसमा नियमित सुननै आयात भएको हुनसक्ने बताइएको छ । अनुसन्धान अधिकारीका अनुसार हरेक पटकमा १६० थानका दरले ब्रेक सु आएको देखिएको छ । यसरी नियमित सुन ल्याउने आँट भन्सार अधिकारीहरुको सेटिङ बिना सम्भव नहुने बताइएको छ । 

विमानस्थल हातामा बरामद भएको सुन प्रकरणमा छानबिनका लागि भन्दै भन्सार विभागले दुई कर्मचारीसहित तीन जनालाई निलम्बन गर्ने निर्णय गरेको छ । यसरी निलम्बनमा पर्नेहरुमा भन्सार जाँचमा संलग्न खरिदार यादव पराजुली, भन्सार एजेन्ट कुमार ढकाल र कर अधिकृत सन्तोष चन्द रहेका छन् ।