ओखलढुंगामा भिजन आईडल सुरु,चार जिल्लाका १२ स्थानमा अडिसन हुने

Posted on: 09 Jun, 2018

जेठ २६, ओखलढुंगा | ओखलढुंगामा भिजन आईडलको दोस्रो संस्करण सुरु भएको छ । स्थानीय स्तरका युवाहरुमा लुकेर रहेको प्रतिभाको विकास गर्ने उद्धेश्यले गतवर्षबाट थालिएको भिजन आईडलको दोस्रो संस्करण शनिवारबाट सुरु भएको हो । 


आईडललाई हरेक वर्ष निरञ्तरता दिने योजना अनुसार यसवर्ष सिजन २ सुरु गरिएको भिजन नेपालका अध्यक्ष पूर्णप्रसाद न्यौपानेले बताए । ‘साहित्य र कलाको उर्भरभूमि ओखलढुंगालाई कला र गलाका माध्यमबाट थप विकास गर्ने उद्धेश्यले यो अभियान थालेका हौं’ अध्यक्ष न्यौपानेले भने ‘नेपालको पहिलो गायिका मेलवा देवी देखि राष्ट्रिय गानका रचियता व्याकुल माईलाले चिनाएको ओखलढुंगालाई पछिल्लो पुस्ताले पनि कला मार्फत चिनाउने अवसर मिल्नेछ भन्ने हाम्रो लक्ष्य हो ।’ सञ्चारका क्षेत्रमा काम गर्दै आएको सामुदायीक संस्था भिजन नेपाल र भिजन नेपाल साप्ताहिक पत्रिकाको वार्षिकोत्सवको अवसरमा हरेक वर्ष भिजन आईडल हुने गरेको छ । 

चार जिल्लाका १२ स्थानमा अडिसन हुने 

यसवर्ष भिजन आईडलको अडिसन चार जिल्लाको १२ स्थानमा हुने भएको छ । ओखलढुंगा, सिन्धुली, उदयपुर र खोटाङका विभिन्न स्थानमा पुगेर अडिसन सञ्चालन गरिने भिजन नेपालका उपाध्यक्ष रविन श्रेष्ठले बताए । स्थानीय सरकारसँगको समन्वयमा कार्यक्रम सञ्चालन हुने उनको भनाई छ ।

शनिवार सिद्धिचरण नगरपालिका ओखलढुंगामा भएको पहिलो अडिसनबाट अर्को चरणका लागि ८ जना छनौट भएका छन् । आयोजकका अनुसार जेठ २८ गते सुनकोशी गाउपालिकाको मुलखर्क, जेठ ३१ गते मानेभञ्ज्याङ गाउँपालिकाको मानेभञ्ज्याङ बजार, असार १ गते फिकल गाउपालिकाको खाङ्गसाङ्ग सिन्धुली, असार २ गते कटारी नगरपालिका १४ घुर्मी बजार उदयपुर, असार ४ गते दित्तेल बजार खोटाङ, असार ५ गते हलेसी बजार खोटाङ, असार ६ गते लिम्चुङबुङ गाउँपालिका उदयपुर, असार ८ गते चिशंखुगडी गाउँपालिका सेर्ना र असार १० गते मोलुङ्गगाउपालिका प्राप्चामा आइडलको अडिसन सञ्चालन हुनेछ । 

पहिलोे चरणको अडिसनबाट छनौट भएका लाई मात्र दोश्रो चरणको प्रतिस्पर्धामा सहभागी गराईने भिजन नेपालका सचिव एसबी जेरोले बताए । उनका अनुसार पहिलो चरणको अडिसनबाट छनौट भएकाहरुले ओखलढुंगा सदरमुकाममा हुने अर्को चरणमा प्रतिस्पर्धा गर्न पाउने छन् । भने उनिहरु मध्येबाट उत्कृष्ट १० छनौट गरिने छ । अडिसनको फाईनल साउन २ गते हुनेछ । 

अडिसनमा प्रथम हुनेले शिल्ड, मेडल र प्रमाण पत्रको साथमा नगद रु २५ हजार, द्वितिय हुनेले मायाको चिनो, मेडल र प्रमाण पत्रको साथमा नगद रु १५ हजार, तृतिय हुनेले  मायाको चिनो, मेडल र प्रमाण पत्रको साथमा नगद रु १० हजार प्राप्त गर्ने छन् । उत्कृष्ट दश लाई मेडल र प्रमाण पत्र प्रदान गरिनेछ भने अडिसनमा सभागिहरु सबैले पनि प्रमाणपत्र पाउनेछन् । उत्कृष्ट प्रतियोगिहरुलाई रेकर्डिङ स्टुडियोहरुमा समन्वय गरि गित रेकर्डिङमा सहयोग गरिने भिजन नेपाल ओखलढुंगाले जनाएको छ ।

भिजनले वर्षमा १ पटक नृत्य र १ पटक गायन प्रतियोगिता आयोजना गर्दै आएको छ । भिजन नेपालको वार्षिक उत्सवका अवसरमा साउन २ मा एकल गायन र भिजन एफएमको वार्षिक उत्सवमा फाल्गुण २ मा एकल नृत्य प्रतियोगिता हुँदै आएको छ ।

यस बिषयमा तपाइको प्रतिक्रिया...!