कविता - कमरेड भाइरस

Posted on: 01 May, 2020


मेरो सानो झुपडी

अलि अलि रिष्ट पुष्ट हुँदै गएको

यहि बेलामा 

कोरोनाले झम्टी झम्टी

नियालो झै बनिसक्यो

विस्तारामा सुतिरहेका घरमालिक ती

बेलाबेला जुर्मुराउँदै व्यूझिन्छन्

आदेश दिन्छन

विहानै उठेर भजन नसुन्नू

राष्ट्रियगान गाउनु

ताली मज्जाले बजाउनु

नाथे कोरोना

महाशक्ति राष्ट्रहरुले हराउन सकेनन

कोरोनासंग थुरथुर कापी रहे

तर

हामी यही

राष्ट्रियगान र ताली बजाएर भगाउने तागत राख्छौं ।

भाइरसलाई हामी

भाइरस बनेर खाइदिन सक्छौं ।

नपत्याए अस्ती भर्खर

कोरोनालाई नुहाउन किन्न लागेको

सुताउनको लागि लिन लागेको

त्यत्रो

चीजलाई हामी भाइरस बनेर खाइदियौं ।

नाथे भाइरसका के कुरा

त्यो भन्दा

हामी सयौ गुणा खतरनाक भाइरस छांैं ।

त्यसैले त

महाराष्ट्रलाई थुरथुर पारिरहेको

धरधरी रुवाही रहेको

कोरोना भाइरस

हाम्रा लागि केही होइन

हामी

३३ क्विन्टल सुन पचाउन सक्छौं

बालुवाटार, ललीता निवास, मेलम्ची

वाइडबडी, न्यारोबडी सर्लक्क निल्न सक्छौं ।

हामी कमेरो पानीलाई

दूधपानी बनाएर बेच्न सक्छौं ।

नाथे कोरोना भाइरस

त्यसै हामीसँग थरथर कहाँ डराएको हो र ?

मोटरका पार्टपूर्जा फेरेझै

शरीरका हरेक इन्जिन फेरेर

जुरुक्क उठेर हामी

राष्ट्रियताका लागि

कात्रोमा पनि कमशिन, भ्याट र कर कुरेर बसेका हुन्छौं ।

नाथे कोरोना भाइरस

कमरेडको यहि तागत देखेर

थुरथुर कापीरहेको छ ।

डराइरहेको छ ।

त्यसैले ढुक्क हुनुहोस्

विहान उठ्ने वित्तिकै

भजन होइन राष्ट्रिय गान बजाउनुहोस

ताली पिट्नुहोस्

नाथे कोरोना

टाप कसीहाल्छ ।

कोभिडले फोक्सो समात्छ

टाउको दुखाउँछ

ज्वरो निकाल्छ ।

वाकवाक लाग्ने बनाउँछ ।

शरीर भारी हुन्छ, सिगान खकार जमाउँछ

तर

हामी सिधै मुटुमा आक्रामण गर्ने हिम्मत राख्छौं ।

ढड्कनलाई हामी मुट्ठीमा कस्न सक्छौं ।

नाथे कोरोना भाइरस

हाम्रो शक्ति देखेर कापीरहेको छ ।

त्यसले

मानवलाई मात्रै आक्रमण गर्छ 

हामी सारा चीज बस्तुलाई आक्रमण गरि

सिध्याइदिनसक्छौं ।

कालोबजारी

कमिशन

भ्रष्टाचार

अनियमितता

यी हाम्रा मुख्य हतियार

मानिसलाई बेकुफ बनाइदिने

यी हाम्रा लक्षणहरु

कठपुतली बनाई दिने यी हाम्रा कारणहरु

कसैले बुझ्दैन,

जान्दैन

जानेपनि बोल्दैन

किनकी

सुखी जन समृद्ध मन

त्यो भन्दा शक्तिशाली हामी

कमरेड भाइरस ।।


यस बिषयमा तपाइको प्रतिक्रिया...!