वैशाख ३०, काठमाडौँ | एजेन्सी | फिनल्याण्डका नेताहरू नेटोमा सामेल हुन सहमत भएका छन्। बिहीबार, फिनल्याण्डका राष्ट्रपति र प्रधानमन्त्री नेटोमा सामेल हुन आवेदन दिने पक्षमा आए। साथै, यो धेरै हदसम्म सम्भव छ कि स्वीडेनले पनि आगामी दिनहरूमा नेटोमा सामेल हुन आवेदन दिन सक्छ।
युक्रेनमा रुसले आक्रमण गरेको साढे दुई महिनाभन्दा बढी भइसकेको छ र त्यसको प्रभाव छिमेकी मुलुकमा ‘डर’को रुपमा देखिएको छ । छिमेकी राष्ट्रहरूले आफ्नो सुरक्षाको बारेमा चिन्ता व्यक्त गरेका थिए र नेटोमा सामेल हुने कदम त्यसैको एउटा हिस्सा भएको मानिन्छ।
तर, यस विषयमा क्रेमलिनले कडा आपत्ति जनाएको छ र रुसबाट धम्कीपूर्ण प्रतिक्रिया आएको छ । रुसबाट चेतावनी दिँदै जवाफी कारबाही गर्न बाध्य पारिएको बताइएको छ । युक्रेन पनि नेटोमा सामेल हुन खोजेकै कारण रूसले आक्रमण गरेको थियो ।
रुसी विदेश मन्त्रालयले जारी गरेको विज्ञप्तिमा फिनल्याण्डको यो कदमले द्विपक्षीय सम्बन्धलाई निश्चित रूपमा हानि पुर्याउने उल्लेख गरिएको छ । यससँगै उत्तरी युरोपको सुरक्षा र स्थिरताको अवस्था पनि प्रभावित हुने बताइएको छ ।
यसैबीच युक्रेनमा सुरु भएको युद्धमा रुसी सेनाले देशको पूर्वी भागमा व्यापक आक्रमण गरिरहेको छ । यसमा मारिउपोलमा आक्रमणहरू समावेश छन्। तर, यस अवधिमा युक्रेनले देशको उत्तर–पूर्वी भागका केही गाउँ र सहर फिर्ता लिएको छ ।
बिहीबार, फिनल्याण्डका राष्ट्रपति साउली निनिस्टो र प्रधानमन्त्री सान्ना मारिनले घोषणा गरे कि देशले तत्काल नेटो सदस्यताको लागि आवेदन दिनुपर्छ। यसका लागि ‘ढिलाइ’ गर्नु हुँदैन।
देशको संसदले यो निर्णयबारे विचार गर्न बाँकी रहे पनि राष्ट्रपति र प्रधानमन्त्रीको घोषणालाई महत्वपूर्ण मानिएको छ ।
फिनल्यान्डले रुससँग १३०० किलोमिटरको सीमा साझा गर्छ। अहिलेसम्म फिनल्यान्डले नेटोसँग दूरी कायम राखेको छ तर युक्रेन युद्धपछि यो ऐतिहासिक कदमतर्फ अघि बढिरहेको छ ।
नेटोमा सामेल हुने अन्तिम निर्णय आइतवार घोषणा हुने अपेक्षा गरिएको छ। स्वीडेनले पनि आइतबार नै अन्तिम निर्णय दिने बताएको छ ।
यस बिषयमा तपाइको प्रतिक्रिया...!