गरिब बिरामीलाई नि:शुल्क शय्या उपलब्ध नगराउने अस्पताल चल्न दिनौं: स्वास्थ्यमन्त्री बस्नेत

Posted on: 03 Jul, 2023

असार १८, काठमाडौँ | स्वास्थ्य तथा जनसंख्या मन्त्री मोहनबहादुर बस्नेतले गरिब, असहाय र विपन्न बिरामीलाई अस्पतालहरूले नि:शुल्क शय्या उपलब्ध गराउन थालेको बताएका छन्।

वीर अस्पतालमा ७ सय, कोशी अस्पतालमा ३ सय ३०, कान्ति बाल अस्पतालमा २ सय ४८, ट्रमा सेन्टरमा १ सय ५०, शहिद गंगागाल राष्ट्रिय हृदय रोग केन्द्रमा ९० शय्या नि:शुल्क उपलब्ध गराउने मन्त्री बस्नेतको भनाइ छ।

‘अस्पतालहरूले सरकारसँग स्वीकृति लिँदा नै १० प्रतिशत शय्या नि:शुल्क उपलब्ध गराउने सहमति गरेका छन्, त्यसअनुसार गरिब, निमुखा, असहाय र विपन्नलाई अस्पतालले शय्या नि:शुल्क उपलब्ध गराउन सुरू गरिसकेका छन्,’ सोमबार पत्रकार सम्मेलन गर्दै मन्त्री बस्नेतले भने।

२२ जिल्लाका विपन्न नागरिकले कार्ड देखाएर र अन्य जिल्लाले वडाको सिफारिस देखाएर अस्पतालहरूमा नि:शुल्क शय्या सुविधा लिन सक्ने स्वास्थ्य मन्त्री बस्नेतको भनाइ छ।

‘नि:शुल्क शय्या उपलब्ध नगराउने अस्पतालहरूलाई चल्न दिनौं, नवीकरण पनि हुँदैन,’ उनले भने, ‘कुनै अस्पतालले कार्यान्वयन गरेनन् भने खबर गर्नुहोला। म पनि अस्पतालहरू अनुगमन गर्दैछु।’

स्वास्थ्यमन्त्री बस्नेतका अनुसार थप संघीय सरकार मातहत रहेका अस्पतालमा पनि नि:शुल्क शैय्या उपलब्ध गराउनेबारे छलफल भइरहेको र प्रदेश सरकार मातहत अस्पतालमा पनि यो सेवाका सुरू गर्नेबारे छलफल अघि बढेको छ।

‘केही अस्पतालमा आर्थिक भार पर्न सक्छ, त्यसो भए स्वास्थ्य मन्त्रालयले ब्यहोर्छ,’ उनले भने, ‘गरिब र विपन्न भएकोले कसैले अब उपचार नपाएर मर्न पर्दैन।’

यस बिषयमा तपाइको प्रतिक्रिया...!