भोली जुलाई १ देखि अन्तर्राष्ट्रिय उडान कसरी हुँदैछन् ? क्वारन्टीनको प्रावधान के छ ?

Posted on: 30 Jun, 2021

असार १६, काठमाडौँ | नेपाल सरकारले कोरोना महामारीपछि सिमित सङ्ख्यामा अन्तर्राष्ट्रिय उडानहरु गरिरहेको छ । हाल चार्टर्ड उडान समेत भईरहेकोमा नागरिक उड्डयन मन्त्रालयले आगामी जुलाई १ बाट नियमित उडानहरूलाई मात्र प्राथमिकतामा राखेर उडान हुने जानकारी प्राप्त भएको छ ।

नेपाल बिस्तारै खुकुलो हुँदै गर्दा पछिल्लो समय नेपालमा कोरोनाभाइरसको डेल्टा प्लस भेरिअन्ट देखा परेको भन्दै टर्कीले नेपालसहित सातवटा देशबाट अर्को सूचना नभएसम्मका लागि यात्रीलाई आफ्नो देशमा प्रवेश नदिने जनाएको छ ।

जुलाई १ देखिको उडान तालिका 


जुलाई १ बाट लागु हुने भनिएको उडान तालिकाअनुसार हप्तामा बुधवार र शुक्रवार भारतको दिल्लीका लागि उडान हुनेछ ।

त्यसैगरी आइतवार, सोमवार, बुधवार र शनिवार कतारको दोहाका लागि उडान हुनेछ । त्यसमा नेपाल वायुसेवा निगमले दुईवटा र कतार एअरवेजले दुईवटा उडान भर्नेछन् ।

त्यस्तै संयुक्त अरब एमेरिटेसको दुबई अन्तर्राष्ट्रिय विमानस्थलमा साताको तीनवटा र सारजाह विमानस्थलमा एउटा उडान हुनेछ ।

त्यस्तै साउदी अरेबियाको दमाम विमानस्थलमा हिमालय एअरलाइन्सको दुईवटा उडान हुने र कुवेत अन्तर्राष्ट्रिय विमानस्थलमा दुईवटा उडान सञ्चालन गरिनेछ । 

ओमानको मस्कटमा एउटा, मलेशियाको क्वालालम्पुरमा साताको तीनवटा र जापानको नारिता अन्तर्राष्ट्रिय विमानस्थलमा एउटा उडान गर्नेछ ।

त्यस्तै टर्कीको इस्तानबुलमा दुईवटा उडान गर्ने योजना सम्बन्धित देशको सरकारको पछिल्लो निर्णयका कारण प्रभावित नहुने बताइएको छ । टर्कीस एअरलाइन्सले जनाएअनुसार यात्रुहरूलाई टर्कीलाई ट्रान्जिटका रूपमा प्रयोग गरी अरू देश जान दिइने भएकाले काठमाडौँ-इस्तानबुल उडान तालिका कायमै रहनेछ ।


हाल पहिलेनै अनुमति पाएका चार्टर्ड उडान भईरहेपनि जुलाई १ देखि चार्टर्ड उडान नभई सबै नियमित उडान तालिकाअन्तर्गत नै रहने प्राधिकरणले जनाएको छ । 


पछिल्लो पटक भएको मन्त्रीपरिषदको निर्णय अनुसार दुवै डोज खोप लगाएकाहरु वा पीसीआर नेगेटिभ प्रमाणित भएको पुष्टि हुने आधिकारिक प्रमाण जनाउने कागजपत्रसहित नेपाल आउने व्यक्तिहरूले अनिवार्य रूपमा घरमा नै १० दिन क्वारन्टीनमा बस्ने सहमतिपछि सोझै घर जान दिइनेछ ।

संशोधित मापदण्डमा आफन्त बितेर अन्तिम संस्कारमा सहभागी हुन आएका व्यक्तिहरू अस्पताल र वडा कार्यालयको सिफारिससहित नेगेटिभ एन्टीजन प्रमाणपत्र भएका व्यक्तिहरू, आधिकारिक सिफारिस सहितका सरकारी कर्मचारी र कूटनीतिक नियोगका अधिकारी लगायतलाई १० दिन घरमा बस्न मिल्नेगरी जान दिइने छ । तोकिएका बाहेक अन्य सबैले भने सात दिनको होटल बुकिङको प्रमाणपत्र प्रस्तुत गर्नुपर्नेछ ।

यस बिषयमा तपाइको प्रतिक्रिया...!