साउन १४, काठमाडौँ । साउदीमा वैदेशिक रोजगारका लागि पुगेका ३० जना नेपालीहरु कम्पनीले सम्झौता अनुसार आवश्यक व्यवस्था नगरिदिँदा समस्यामा परेका छन् ।
समस्यामा परेका नेपालीहरुले रातदिन काम गर्न आउने तलबको आधा खर्च रासन-पानी किन्नमै खर्च हुने र खाना समेत पेट अघाउन्जेलसम्म खान नसकिने अवस्था रहेको बताएका छन् । पीडितहरु काठमाडौँको सिनामंगलमा रहेको न्यू एसभी इन्टरनेशनल प्रा. लि. र सामाखुसीमा रहेको अल अमल ओभर्सिज प्रा.लिबाट सात महिना अघि वैदेशिक रोजगारीका लागि साउदी पुगेका थिए ।
पीडितहरु ।
पीडितहरुले लामो समयदेखि पर्याप्त मात्रामा पानी समेत खान नपाएर बिरामी पर्न थालेपछि उनीहरूले उद्धार गरेर नेपाल फकाईदिन हारगुहार गरेका छन् । समस्यामा परेका नेपालीहरुले साउदीस्थित नेपाली महावाणिज्य दूतावास, वैदेशिक रोजगार विभाग तथा मेनपावर कम्पनीलाई पटक पटक आफ्नो समस्या समाधानको लागि अनुरोध गर्दै आएका छन् । तर, हालसम्म उनीहरूको समस्या समाधान हुन सकेको छैन ।
म्यानपावर तथा सम्बन्धित निकायसँग पीडितहरुले समस्या समाधानको लागि हार-गुहार गर्दै गर्दा एक नेपालीको सुतेकै अवस्थामा ज्यान गएको पीडितहरुले जनाएका छन् । समस्याग्रस्त कम्पनीमा काम गर्ने दोलखाका ४३ वर्षीय टहल बहादुर थामी सुतेकै अवस्थामा ओछ्यानमा मृत फेला परेका थिए । निधन भएको एक महिना ३ दिन बितिसक्दा पनि उनको शव नेपाल पठाइएको छैन । आफूसँगै कम्पनीमा काम गर्ने साथीको मृत्यु भएपछि अन्य नेपाली थप आत्तिएका छन् ।
यस बिषयमा तपाइको प्रतिक्रिया...!