एमालेमा उठ्यो वरिष्ठ उपाध्यक्ष पद खारेजीको विषय

Posted on: 28 Nov, 2021

मंसिर १२, चितवन | दशौं महाधिवेशनबाट सहमतिमा नेतृत्व चयन गर्न ‘सकस’ भएपछि नेकपा एमालेमा वरिष्ठ उपाध्यक्ष पद खारेज गर्नुपर्ने विषय उठेको छ। वरिष्ठ उपाध्यक्षमा कुरा नमिलेपछि उक्त पद नै खारेज गर्न सुझाव आएको हो। वरिष्ठ उपाध्यक्षमा नेताहरूले आ-आफ्नो अडान नछोडेपछि एमाले अध्यक्ष केपी शर्मा ओलीलाई नेता सुवास नेम्वाङले उक्त पद नै खारेज गर्न ओलीलाई सुझाव दिएका हुन्।

ओलीले ईश्वर पोखरेललाई वरिष्ठ उपाध्यक्ष बनाएर नेम्वाङलाई उपाध्यक्ष बनाउन चाहेका छन्। यसअघि एमालेले भविष्यमा प्राप्त गर्न सक्ने राष्ट्रपति, उपराष्ट्रपति, सभामुख जस्ता पदमा सिफारिस गर्ने गरी ओलीले नेम्वाङलाई मनाउने प्रयास गरेका थिए। तर, त्यसमा नेम्वाङ राजी भएका छैनन्। एमाले एक नेताका अनुसार नेम्वाङले पार्टीमा ओलीबाहेक अरूलाई नेता नमान्ने सन्देश ओलीलाई पठाएका छन्।

यदि आफूलाई उपाध्यक्षमा राख्ने भए वरिष्ठ उपाध्यक्ष पद खारेज गर्न सुझाव दिएको ती नेता बताउँछन्। वरिष्ठ उपाध्यक्ष बाहेक उपाध्यक्ष, महासचिव र सचिवका आकांक्षीहरु पनि धेरै भएकाले ओलीलाई पदाधिकारी चयनमा सहमति निकाल्न सकस भएको छ। ओलीले पदाधिकारीको टुंगो लगाउन आफू निकट चार नेतालाई जिम्मेवारी दिएका थिए।

विष्णु पौडेल, शंकर पोखरेल, पृथ्बीसुब्बा गुरुङ र प्रदीप ज्ञवालीले कमिटीको खाका तयार पारेका छन्। उक्त खाका अध्यक्ष ओलीलाई बुझाइएको छ। ओलीले रुजु गरेर आजै साँझ बस्ने बन्दसत्रमा सुनाउने बताइएको छ। यता अध्यक्षका दाबेदार रहेका भीम रावले उक्त नामावली आफूले नमान्ने बताएका छन्। उनले निर्वाचनको माध्यमबाटै कमिटीको टुंगो लगाउनुपर्ने बताएको उनी निकट नेताहरूले बताएका छन्।

त्यसो नगरिए बन्दसत्र बहिष्कार गर्ने चेतावनीसमेत दिइएको बताइएको छ। यद्यपि ओलीले नेताहरूसँग छुट्टाछुट्टै र सामूहिक भेट गरेर मनाउने प्रयास गरिरहेका छन्। छलफलमा ओलीले सहमतिको वातावरणका लागि आग्रह गरिरहेका छन्।

यस बिषयमा तपाइको प्रतिक्रिया...!