कृष्णकुमार श्रेष्ठ (किसान): दोस्रो पटक प्रतिनिधिसभामा

Posted on: 23 Nov, 2022

मङ्सिर ६, काठमाडौँ । नेकपा (एकीकृत समाजवादी) का केन्द्रीय सदस्य तथा पूर्वमन्त्री कृष्णकुमार श्रेष्ठ (किसान) सङ्घीय संसद्, प्रतिनिधिसभामा दोस्रो पटक सदस्य बन्नुभएको छ । 

उहाँ बारा–४ बाट प्रतिनिधिसभा सदस्यमा निर्वाचित हुनुभएको हो । व्यास नगरपालिका–४ तनहुँमा विसं २०२४ मा जन्मिनुभएका श्रेष्ठले सत्तारूढ गठबन्धनका तर्फबाट उम्मेदवारी दिई २९ हजार पाँच सय मतसहित जित हासिल गर्नुभएको छ । 

श्रेष्ठले एमाले–जसपा गठबन्धनका तर्फबाट उम्मेदवार बनेका एमालेका एकवाल मियाँलाई करिब १० हजार मतान्तरले पराजित गर्नुभएको हो । एकवालले भने १९ हजार चार सय ३९ मत प्राप्त गर्नुभयो । लोकतान्त्रिक समाजवादी पार्टीमा रहेका एकवाल टिकट नपाएपछि मनोनयन दर्ताको केही दिनअघि मात्र नेकपा (एमाले) मा एमाले प्रवेश गर्नुभएको थियो । बाबु केबलबहादुर श्रेष्ठ र आमा लेसकुमारी श्रेष्ठको कोखबाट जन्मिनुभएका श्रेष्ठले २०७४ सालको सङ्घीय संसद्को निर्वाचनमा तनहुँ क्षेत्र नं १ बाट प्रतिनिधिसभामा निर्वाचित हुनुभएको थियो । 

विसं २०३८ मा अनेरास्ववियुको विद्यार्थी जिल्ला कमिटीमा आबद्ध भई विद्यार्थी राजनीति सुरुआत गर्नुभएका श्रेष्ठ राजनीतिमा आबद्ध हुुनुभन्दा पहिला व्यापार व्यवसायमा हुनुहुन्थ्यो । विसं २०५२ मा नेकपा (एमाले)को सदस्य रहनुभएका श्रेष्ठ एमाले तनहुँको सल्लाहकार हुँदै तनहुँ जिल्ला कमिटीमा आबद्ध हुनुहुन्थ्यो ।

व्यापारिक पृष्ठभूमिबाट सक्रिय राजनीतिमा लाग्नुभएका श्रेष्ठको राजनीतिक आबद्धता भने तीन दशकभन्दा बढी छ । भौतिक पूर्वाधारका क्षेत्रमा संलग्न उहाँ रेडक्रसलगायतका सामाजिक सङ्घसंस्थामा समेत आबद्ध हुनुहुन्छ ।  

यस बिषयमा तपाइको प्रतिक्रिया...!