कात्तिक ४, काठमाडौँ | सन् २०२१ का लागि अमेरिकी इलेक्ट्रोनिक्स डाइभर्सिटी भिसा (डिभी) को आवेदन आगामी कात्तिक १९ गते मंगलबार राति १०:४५ बजेसम्म खुलेको छ । नेपाली समयअनुसार असोज १५ गते बुधबार राति ९:४५ बजेबाट आवेदन दर्ता सुरु भएको थियो । 

नेपाल स्थित अमेरिकी दुतावासले डिभी चिट्ठा भर्नका लागि कुनै पनि शुल्क नतिर्न भनेको छ । अमेरिकी दूतावासले डिभी चिट्ठा भर्दा कन्सल्टेन्टको सहयोग नलिन सल्लाह दिएको छ । 

यस पटकदेखि डिभी भर्नका लागि पासपोर्ट नम्बर अनिवार्य भएपछि पासपोर्ट बनाउने भीड लागेको छ । त्यसो त पासपोर्ट अनिवार्य भएपछि पैसा लिएर डिभी भर्ने ठाउँहरुमा डिभी पर्ने दोब्बर चान्स भन्दै बिज्ञापन गरिएका छन् । यस अघि उमेर पुगेका र शैक्षिक योग्यताको आधारमा जोसुकैले डिभी भर्न सकिने अवस्था भएपनि यस पटकदेखि पासपोर्ट अनिवार्य भएपछि दोब्बर चान्स भन्दै बिज्ञापन गरिएका हुन् । 

डिभी २०२१ का लागि नयाँ व्यवस्थाअन्तर्गत मुख्य आवेदकको बहालवाला, म्याद नसकिएको, विदेश भ्रमण गर्न मिल्ने राहदानीको राहदानी सङ्ख्या, जारी भएको देश र म्याद समाप्त हुने मिति लगायतको जानकारी दिनुपर्ने भएको छ । 

सन् २०२१ को डिभी चिट्ठाका लागि आवेदकहरूले फारम भर्न पाइने मितिभित्र www.dvlottery.state.gov मा गई डिभी चिट्ठाको आवेदन फारम भर्नुपर्नेछ । फारम भर्दा आफ्ना श्रीमान्–श्रीमती र फारम भर्ने मिति कात्तिक १९ गते राति १०:४५ बजेसम्म २१ वर्ष नपुगेका सबै अविवाहित सन्तानको विवरण अनिवार्य भर्नुपर्नेछ । श्रीमान्, श्रीमती र सन्तानको विवरण नभरी पेस गरिएको आवेदन मान्य हुँदैन । 

अघिल्लो बर्ष खिचिएको फोटो मान्य हुनेछैन भने चस्मा लगाएर खिचिएको तस्बिर पनि स्वीकार्य हुनेछैन । डिभीका लागि पेस गरिने तस्बिरले पनि अमेरिकी भिसाका लागि पेस गरिने तस्बिरसरहकै मापदण्ड पूरा गर्नुपर्छ । आवेदकले सम्पादन गरेको तस्बिर अयोग्य ठहरिनेछ वा भिसा जारी हुनेछैन । 

आवेदन दिने योग्यता माध्यमिक तहको शिक्षा वा त्यसको समानार्थ शिक्षा जसको अर्थ प्राथमिक र माध्यमिक गरी १२ वर्षे औपचारिक शिक्षा सफलताका साथ पूरा गरेको हुनुपर्छ । 

 डिभी भरेपछि आफ्नो कन्फर्मेसन नम्बरलाई सेभ वा प्रिन्ट गरेर राख्नुपर्नेछ । किनभने पछि डिभी परे नपरेको हेर्ने यही कन्फर्मेसन नम्बरबाट हो । तपाईलाई डिभी चिट्ठा पर्‍यो कि परेन भन्ने कुरा आगामी २०७७ साल वैशाख २३ गते (मे ५, २०२०) का दिन थाहा हुन्छ ।