कैलाश खत्री । फागुण २ गते, रामेछाप । रामेछाप जिल्ला नेपालको ३६ औ जिल्लाको रुपमा पुर्ण खोप जिल्ला घोषणा भएको छ ।  बुधबार रामेछापको पुरानो सदरमुकाम रामेछाप बजार स्थित गौरिशंकर क्याम्पसको प्राङगणमा आयोजित एक कार्यक्रमका बिच प्रतिनिधि सभाका सांसद श्याम कुमार श्रेष्ठले पुर्ण खोपयुक्त जिल्ला भएको घोषणा गरेका हुन् ।

कार्यक्रमलाई सम्वोधन गर्दै प्रतिनिधि सभाका सांसद एवं पुर्व गृहराज्यमन्त्री श्याम कुमार श्रेष्ठले रामेछाप जिल्ला पुर्ण खोपयुक्त घोषणा हुनु स्वास्थ्य क्षेत्रको लागि ठुलो उपलब्धी भएको बताए । उनले जिल्लाका स्वास्थ्य संस्थाहरुलाई सुविधा सम्पन्न र स्तरीय सेवा दिन सक्ने बनाउन सहयोग गर्ने समेत प्रतिवद्धता ब्यक्त गरे । उनले भने -"नयाँ सरकार बनेसंगै स्वास्थ्य क्षेत्रका लागि थप बजेट र कार्यक्रम यस क्षेत्रमा ल्याउन पहल गर्छौ ।"

जिल्लाका ६ गाउँपालिका र २ नगरपालिका भित्रका जन्मेदेखी १५ महिना सम्मका बालबालिकाले लगाउनुपर्ने ११ प्रकारका खोपका मात्रा पुरा गरेकाले खोप सुनिश्चित भएको जिल्ला अस्पताल रामेछापका प्रमुख डा.प्रकाश प्रसाद साहाले जानकारी दिए ।  उनले भने - " रामेछापका ३ हजार २ सय ३४ खोप उमेर समुहका बालबालिकाले खोपको सबै मात्रा पुरा गरि सकेका छन् ।"

कार्यक्रममा प्रदेशसभाका सांसद शान्ति प्रसाद  पौडेल, जिल्ला समन्वय समिति रामेछापका प्रमुख प्रेम बहादुर खड्का , मन्थली नगरपालिका प्रमुख रमेश कुमार बस्नेत , रामेछाप नगरपालिका प्रमुख नर बहादुर थापा मगरले मन्तव्य राखेका थिए ।उनीहरुले स्थानीय तहले स्वास्थ्य संस्थालाई गर्नुपर्ने सहयोगका लागि प्रतिवद्ध भएको बताए । कार्यक्रमका अवसरमा ६ वटा गाउँपालिका २ नगरपालिका र स्वास्थ्य क्षेत्रमा काम गर्ने  विभिन्न संघ संस्थाहरुलाई पुर्ण खोप सुनिश्चितता भएको प्रमाणपत्र प्रदान गरिएको थियो ।