हिलोमै त फूल्छ कमल : ३.९० जिपिए ल्याउने इन्द्रको सपना यस्तो छ (भिडीयो सहित)

Posted on: 21 Jun, 2017

प्रभात सुवेदी । असार ७, बर्दिया । 

थारु परिवारमा जन्मेको गरिब किसानको छोरो । आमाबाबाले आफूले पढ्न नपाएपनि सन्तानलाई पढाउने रहर र धोका पूरा गर्नका लागि खाइनखाइ गरेर छोरालाई पढाउन बर्दिया जिल्लाको राम्रो सामुदायिक विद्यालय मध्येको एक मानिएको विद्यालय बगलामुखी राधाकृष्ण थारु माध्यमिक विद्यालयमा आज भन्दा छ वर्ष अघि आफन्तको जिम्मा लगाएर पठाए । सानैदेखि नै ती बालकले आमाबाबाको सपनालाई राम्ररी बुझे अनि आत्मसात गरे ।

आफन्त दाइसँगै गुलरियामा बसेर आँफै खाना पकाउने भाँडा माझ्ने कामसँगै उनले आफ्नो पढाइलेखाई अगाडि बढाउँदै गए । विद्यालयमा गुरुहरुको मार्गनिर्देशसँगसँगै, अनुशासन, मर्यादा र जीवनको महत्वलाई बुझ्दै निरन्तर अध्ययनमा लागिरहे उनी । 

विद्यालयमा लिइने प्रत्येक कक्षाको अन्तिम परीक्षामा उनी कक्षा प्रथम मात्रै हैन कि विद्यालय प्रथम हुँदै विद्यालयका गुरु अनि गुरुआमाहरुको न्यानो माया र स्नेह अनि असल मार्गदर्शनलाई पहिल्याउँदै निरन्तर अगाडि बढिरहे । उनी आफूलाई विद्यालयमा पनि अलि फरक ढङ्गले प्रस्तुत गर्दथे । उनी शालीन थिए अनि आफूले अरुको कुरालाई अत्यन्तै गम्भीरतापूर्वक सुन्दथे । 

जिल्लाको अत्यन्तै विकट मानिएको साविक पाताभार हाल गेरुवा गाउँपालिकाको वडा नं. ४ मा बस्दै आएका इन्द्रबहादुर चौधरी आमाबाबालाई छाडेर एउटा सानो बालक घरदेखि करिब ६० किलोमिटरको दूरी टाढा आएर पढ्नु भनेको पनि चानचुने कुरा भने हैन । 

सानैदेखि लगनशील, मिहिनेती र अत्यन्तै इमान्दारी भएर पढ्दै जाँदाको सफलता भने २०७३ सालको एइई परीक्षाको नतिजाले देखायो । सबै विषयमा उनले ए प्लस प्राप्त गरका छन् भने अङ्ग्रेजी र सामाजिकमा मात्रै ए ग्रेड प्राप्त गरेका छन् (हे. ग्रेडसिट: स्रोत :http://see.ntc.net.np/gradesheet.php)। समग्रमा उनको जिपिए ३.९० रहेको छ । यो नतिजाले इन्द्रलाई अझ हौस्याएको छ । उनमा अझ प्रगति गर्ने जाँगर पलाएर आएको छ । अब उनले सोचेका छन् कि एउटा सक्षम र सबल नागरिक बनेर यो देशको सेवा गर्ने ।

आफ्नो अध्ययनको तरीकाका बारेमा इन्द्रबहादुर भन्छन्, ‘म दिनमा त्यस्तै ४÷५ घण्टा अध्ययन गर्ने गर्दथेँ अनि परीक्षाको समयमा पनि उत्तिकै ध्यान दिएर पढ्ने गर्दथेँ । सबैको पढ्ने आ–आफ्नै तरीकाहरु हुन्छन् र मेरो पनि आफ्नै तरीका छ । त्यहि तरीकाको नियमित पालना र अनुसरणका कारण आज म यो स्थानसम्म आइपुगेको छु ।’ त्यो हो, ‘मैले जे विषयका बारेमा अध्ययन गर्छु त्यो तुरुन्त टिपोट गर्दैै जान्छु । जे पढ्छु त्यसको नोट तुरुन्तै गर्छु । कहिँ कतै जाँदा बिर्सिहालेँ भनेपनि कपि निकालेर पुनरावलोकन गरिहाल्छु ।’ 

उनको यही सफलताको कारण गुलरियामा रहेको बगलामुखी राधाकृष्ण थारु माध्यमिक विद्यालयको प्रतिष्ठा पनि उच्च भएको छ । ए प्लस ग्रेडमा उनीसँगै अरु ३ जनाले प्राप्त गर्दा  विद्यालयको नतिजा जिल्लामा नै सर्वोत्कृष्ट भएकोले गर्दा निकै खुशी भएका छन् उनका गुरुगुरुआमाहरु अनि विद्यालय सम्बद्ध सम्पूर्ण व्यक्तित्वहरु । उनले यो नतिजा प्राप्त गरेपछि भने जिल्लाभित्र तथा जिल्ला बाहिरबाट उनलाई निःशुल्क पढाइदिने भनेर विभिन्न कलेज तथा स्कूलहरुबाट फोनहरु आएका छन् । 

सदरमुकाम, नेपालगञ्ज तथा काठमाडौंदेखि पनि उनलाई आफ्नो कलेज वा स्कूलमा पढ्न आउनका लागि जोडबल गरिएको छ । उनले नेपाल सरकारबाट कक्षा ११ पढ्दा पाइने छात्रवृत्तिको लगि फारम पनि भरिसकेका छन् । उनले राजधानीमा नै पढ्ने इच्छा भएकोले पनि त्यो फारम काठमाडौं जिल्ला शिक्षा कार्यालयमा बुझउने विचार गरेका छन् ।

इन्द्र भन्छन्, ‘म जे भएँ त्यो मेरो लगनशीलता हो । उत्सुकता जाग्यो भने त्यसैले नै सफलतातर्फ डो¥याउने रहेछ । त्यसैले यसका लागि मिहिनेतका साथ लाग्नु पर्दछ र हामीले आफ्नो लक्ष्यलाई कहिल्यै पनि विर्सनु हुँदैन । बाहिरी वातावरण जे जस्तो होस् आफूले लक्ष्यका साथ अगाडि बढ्यौ भने सफलता पाइने रहेछ भन्ने कुरा भएपनि लक्ष्य राखेर पढ्नुपर्ने रहेछ ।’


उनको भविष्यको लक्ष्य भनेको वन विशेषज्ञ वन्ने रहेको छ । अर्थात उच्च शिक्षा वन विज्ञान विषय लिएर अध्ययन गर्ने सोच बनाएका छन् । यस क्षेत्रमा काम गर्ने सक्षम मानिसहरुको अभाव भएको र आफ्नो रुचीको क्षेत्र पनि भएकोले वन विज्ञान पढ्ने इच्छा जागेको हो । धनी परिवारमा जन्मनु भन्दा यस्तै गरिब परिवारको सदस्य भएर जन्मनुमा मलाई गर्व छ, आज म जे छु मेरो परिवारको कारणले गर्दा छु । मेरो परिवार धनी भएको भए आज मैले संघर्ष के हो भन्ने कुरा बुझ्न पाउने नै थिइन र यो सफलता पनि प्राप्त गर्ने थिइन । 

गीत सङ्गीत पनि उत्तिकै मन पराउने इन्द्रलाई नेपाली लोकदोहोरी तथा आधुनिक गीतहरु उत्तिकै मन पर्ने बताउछन् । देशको प्रधानमन्त्री बनेमा पहिलो काम हुनेछ भन्ने सवालमा भने उनले शिक्षा क्षेत्रलाई जोड दिँदै भने, ‘मैले शिक्षालाई गुणस्तरीय र सर्वशुलभ बनाई एउटा विशेष कोष खडा गरी म जस्तै गरिब परिवारका विद्यार्थीहरुका लागि अध्ययनको व्यवस्था गर्न  एउटा अलग छात्रवृत्ति कोषको स्थापना गर्ने थिएँ । 

इन्द्रबहादुर चौधरीलाई हामी सबैको तर्फबाट हार्दिक बधाई सहित उच्च शिक्षा सफल रहोस भनी कामना । हेर्नुहोस् भिडियो :

 


यस बिषयमा तपाइको प्रतिक्रिया...!