ज्वालामुखी गाउँपालिका जोड्ने कालोपत्रे सडक निर्माणमा ढिलासुस्ती, पटक-पटक म्याद थप

Posted on: 22 Sep, 2022

अनिल अधिकारी । असोज ६, काठमाडौँ । धादिङको पाल्पा भन्ज्याङदेखि सादभन्ज्याङसम्मको सडक कालोपत्रे गर्ने काम सम्पन्न भईसक्नुपर्ने मिति २०७८ पुष ३० गते हो, तर यो सडक अझै कालोपत्रे भईसकेको छैन । त्यसो त यहि सडक खण्डको निर्माणाधीन सडकको कारण सवारी आवागमनमा असहज अवस्था छ । 

बडादशैंसँगै मङ्सिरमा हुन गईरहेको संघिय निर्वाचनको मिति नजिकिदै गर्दा यहि अलपत्र अवस्थामा रहेको सडकको कारण स्थानिय निकाय तथा राजनीतिक दलमा आवद्ध नेताहरु आलोचनाको सिकार बनिरहेका छन् । स्थानिय सरकारलाई समेत यो सडक कहिलेसम्म कालोपत्रे भईसक्छ भन्ने जानकारी दिईएको छैन । 

काठमाडौँ कलंकी स्थित कार्यालय भएको कास्यप समिर जेभीका (ठेकेदार माधव घिमिरे)ले यो सडक खण्डको ४.४ किलोमिटर कालोपत्रे गर्ने ठेक्का लिएका हुन् । जस अन्तर्गत पाल्पाभन्ज्याङदेखि नीलकण्ठ नगरपालिका तर्फ दुई किलोमिटर र ज्वालामुखी गाउँपालिका तर्फ २.४ किलोमिटर कालोपत्रे गर्ने सम्झौतामा छ । यो योजना अन्तर्गत बन्ने कालोपत्रे सडकको मोटाई ३० एमएमको हुने सम्झौतामा छ । 

पूर्वाधार बिकास कार्यालय नुवाकोटले कास्यप समिर जेभी कम्पनीसँग सडक निर्माणको लागि २०७७ असार १७ गतेनै ठेक्का सम्झौता गरेको थियो । सम्झौता अनुसार झन्डै डेढ बर्षमा सक्नुपर्ने काम कास्यप समिर जेभीले म्याद थपिथपि आगामी चैत मसान्तसम्म पुर्याएको छ । म्याद थप्नुको कारण कोरोना महामारी भएको बताइएको छ । 

हालसम्म यो सडकको ६५ प्रतिशत काम सम्पन्न भएको प्रादेशिक सडक डिभिजन कार्यालय, धादिङका निमित्त कार्यालय प्रमुख मदन आले मगर बताउँछन् । आलेका अनुसार पूर्वाधार बिकास कार्यालय नुवाकोटको टेन्डरमा गत पुषमा ठेक्का म्याद सकिएपनि कोरोनाको कारण देखाई ठेकेदार घिमिरेले गत २०७९ असार १७ गतेसम्म निर्माण सम्पन्न गर्ने भनि पुन: सम्झौताको म्याद पाएको थियो । त्यसपछि यो योजना हेर्ने जिम्मेवारी प्रादेशिक सडक डिभिजन कार्यालय धादिङले पायो । यो कार्यालयले गत साउन १ देखि मात्र यो योजनालाई हेर्ने जिम्मेवारी पाएको आले बताउँछन् । पटक-पटक ठेक्काको म्याद थपेर सडक निर्माणको कार्य सम्पन्न नभएको यो योजनाको अब अर्को म्याद थप्न नसक्ने आलेको भनाई छ । उनका अनुसार नजिकिदै गरेको बडादशैंलाई मध्यनजर गरि बिग्रिएका स्थानहरुमा समेत सहज आवागमनको लागि सडक निर्माण गर्न ठेकेदार कम्पनीलाई ताकेता गरिएको छ । 

यता समयमै सडक निर्माण नभएको कारण अपजस आफूले पाएको ज्वालामुखी गाउँपालिकाका प्रमुख यामनाथ दनैको गुनाशो छ । स्थानिय निकाय प्रमुख दनैका अनुसार यो सडक निर्माणको ठेक्का पाएका कास्यप समिर जेभीका संचालक माधव घिमिरेले लामो समयदेखि गाउँपालिका प्रमुखकै फोन उठाएका छैनन् । समयमै सडक निर्माण सम्पन्न नभएपछि गाउँपालिकाले ध्यानाकर्षण गर्न खोज्दा ठेक्का पाएको कम्पनी सम्पर्कमै आउन नचाहेको दनैको भनाई छ । उनले सडक निर्माणको टेन्डर र सुपरिवेक्षण अर्कै निकायले गर्ने भएको कारण स्थानिय सरकार मुकदर्शकजस्तो बन्नुपरेको गुनाशो गरे । दनैले भने “ठेक्का लिने कम्पनीले समयमै निर्माण नसक्दा जनताले हामीलाई गाली गरेका छन्, अपजस हामीले खेप्नुपरेको छ, सडक नबन्दा स्थानियलाई मर्का परेको छ, जनताको आक्रोश हामीमाथि छ । हाम्रो पालिकामा बन्ने सडकको हामीलेनै समन्वय तथा सुपरिवेक्षण गर्न नपाउने कुरा अचम्मको कुरा हो ।” 

यता सडक निर्माणको जिम्मा लिएको कास्यप समिर जेभीका माधव घिमिरेलाई सडक निर्माणको प्रगति विवरण र आगामी योजनाको बिषयमा थप जानकारी लिन खोज्दा ठेकेदार घिमिरेले साइट हेर्ने व्यक्तिको नम्वर पठाईदिन्छु भनेर फोन नम्बर समेत नपठाई टारेका छन् । ठेक्का लिएर समयमै काम गर्न नसकेको कास्यप समिर जेभीले कोरोना र निर्माण सामग्री महंगिएको बहाना गर्दै ठेक्का अवधि थप्दै आएको पाइएपछि प्रादेशिक सडक डिभिजन कार्यालय, धादिङले उसलाई दिनुपर्ने भुक्तानीमा समेत कडाई गरेको बताएको छ । बर्षाको कारण केहि समय काम रोकिएको जस्तो भएपनि दशैं अघि गर्नुपर्ने मर्मत गर्ने र दशैँपछि योजनाको बाँकी काम गर्ने जानकारी ठेकेदार कम्पनीले आफूहरुलाई जानकारी दिएको प्रादेशिक सडक डिभिजन कार्यालय, धादिङका निमित्त कार्यालय प्रमुख मदन आले मगरले बताए । आलेका अनुसार सम्झौतामा भए अनुसार कालोपत्रे अघि गर्नुपर्ने पुर्व तयारीको काम अझै डेढ किलोमिटर जति गर्नुपर्ने अवस्था छ । 

यस बिषयमा तपाइको प्रतिक्रिया...!