नीति तथा कार्यक्रम तर्जुमाको तयारीमा डोटीका स्थानीय तह

Posted on: 10 Jun, 2021

विमलबहादुर विष्ट । जेठ २७, डोटी (रासस)। डोटीका स्थानीय तह आगामी आर्थिक वर्ष २०७८÷७९ को बजेट, नीति तथा कार्यक्रम तर्जुमाको तयारीमा जुटेका छन् । दुई नगरपालिका तथा सात गाउँपालिकासहित नौ स्थानीय तह रहेको यस जिल्लामा अहिले सबै स्थानीय तह नीति तथा कार्यक्रम तर्जुमाको तयारीमा जुटेका हुन् ।

बजेट, नीति तथा कार्यक्रमको तयारी शुरु हुँदै गर्दा यहाँका स्थानीय तहले सुझाव माग गर्न शुरु गरेका छन् । आगामी वर्षको बजेट, नीति तथा कार्यक्रममा समेट्न सकिने विषयलाई सुझाव माग गरिएको दिपायल सिलगढी नगरपालिकाका निमित्त प्रमुख प्रशासकिय अधिकृत खेमराज गुरुङले बताउनुभयो । उहाँले भन्नुभयो, “आगामी वर्षको बजेट, नीति तथा कार्यक्रममा समेट्न सुझाव माग गरेका छौँ, इमेलबाट पनि सुझाव दिन सक्ने व्यवस्था मिलाएका छौँ ।”

कोरोना कहरले जिल्ला आक्रान्त भइरहेका बेला पनि यहाँका स्थानीय तह नीति तथा कार्यक्रम तर्जुमाको तयारीमा जुटेका छन् । स्थानीय सरकारले नीति कार्यक्रम र बजेट ल्याउने समयावधि अब १५ दिनमात्र बाँकी छ । कानूनीरूपमा आगामी असार १० गतेसम्म नीति तथा कार्यक्रम र बजेट परिषद्मा टेबल गर्नुपर्ने प्रावधानअनुसार स्थानीय तह जुटिरहेको बोगटान फुड्सिल गाउँपालिकाका अध्यक्ष कमलबहादुर गड्सिलाले बताउनुभयो ।

यहाँका कतिपय पालिकाले स्वास्थ्य मापदण्ड पूरा गरेर कमभन्दा कम नागरिक भेला गरेर योजना छनोट गर्ने गरी काम गर्न थालेको जोरायल गाउँपालिकाका अध्यक्ष दुर्गादत्त ओझाले जानकारी दिनुभयो ।

यसैगरी शिखर नगरपालिकाले पनि इमेलमार्फत आगामी आर्थिक वर्षको योजनाका लागि सुझाव माग गरिरहेको बताइएको छ । बजेटमा समावेश गर्नुपर्ने विषयवस्तुका सम्बन्धमा रचनात्मक सुझाव दिन राजनीतिक दल, नागरिक समाज, सरकारी तथा गैरसरकारी सङ्घसंस्था, शिक्षक, बुद्धिजीवी, पेशा व्यवसायीलाई सुझाव दिनका लागि अनुरोध गरिएको निमित्त प्रमुख प्रशासकीय अधिकृत पर्मानन्द शर्माले बताउनुभयो । उहाँले भन्नुभयो, “हामीले सबै क्षत्र तह र तप्काबाट सुझाव माग गरेका छौँ, आशा छ सबैले राम्रै तथा रचनात्मक सुझाव पेश गर्नु हुनेछ ।”

यसैगरी जोरायल गाउँपालिकाले एकीकृत विकास गुरुयोजनाको दीर्घकालीन सोच, लक्ष्य तथा आवश्यकताका आधारमा बजेट, नीति तथा कार्यक्रम बनाउने लक्ष्य लिएको प्रमुख प्रशासकीय अधिकृत नरेन्द्र ठगुन्नाले जानकारी दिनुभयो । उहाँका अनुसार गाउँपालिकाले यही जेठ २८ गतेभित्र सरोकारवालासँग बजेटका लागि प्रस्ताव माग गरिएको छ । 

यस्तै बडिकेदार, सायल, आदर्श, केआइसिंह तथा पुर्वीचौकी गाउँपालिकाले पनि जनताको आवश्यकता र मागका आधारमा बजेट, नीति तथा कार्यक्रम तर्जुमा गर्ने लक्ष्य लिएको जनाएका छन् । ती गाउँपालिका पनि एकीकृत विकास गुरुयोजनाको दीर्घकालीन सोच, लक्ष्य तथा आवश्यकताका आधारमा बजेट, नीति तथा कार्यक्रम बनाउने लक्ष्य लिई बजेट, नीति तथा कार्यक्रम तर्जुमाको तयारीमा जुटेका बताइएको छ ।


यस बिषयमा तपाइको प्रतिक्रिया...!