परासीमा अत्याधुनिक शवगृह बन्दै

Posted on: 31 May, 2019

जेठ १७, परासी । पश्चिम नवलपरासीको सदरमुकाम परासीमा अत्याधुनिक  सुविधासम्पन्न शवगृहको निर्माण कार्य शुरु भएको छ । परासीस्थित जिल्ला पृथ्वीचन्द्र अस्पतालमा रहेको पुरानो शवगृहलाई विस्थापित गरी अत्याधुनिक सुविधासम्पन्न शवगृहको निर्माण शुरु गरिएको हो । 

पुरानो शवगृह बजारको नजिक तथा मुख्य सडक छेउमै हुँदा दुर्गन्ध फैलिएको र अन्यत्र सार्न स्थानीयले माग गरेको विषयमा गत फागुन २९ गते राससमा समाचार प्रकाशित भएपछि त्यस विषयमा अस्पतालको ध्यानाकर्षण भएको थियो । अस्पतालले तत्काल प्रदेश नं ५ को सामाजिक विकास मन्त्रालयसँग बजेट माग गरी अत्याधुनिक शवगृह निर्माणको पहल गरेको थियो । 

हालै प्रदेश सरकारले रु ५० लाख बजेट विनियोजन गरी पठाएपछि अस्पतालले बजार क्षेत्रभन्दा बाहिर अस्पतालको उत्तर पूर्वमा रहेको खाली जग्गामा शवगृह निर्माण शुरु गरेको हो । आगामी असार मसान्तभित्रै निर्माण सम्पन्न हुने उक्त शवगृहमा छ वटासम्म शव राख्न मिल्ने अस्पतालका प्रबन्धक सुरेन्द्र अधिकारीले जानकारी दिनुभयो । 

शवगृह निर्माणको जिम्मा पोखरेल निर्माण सेवा बर्दघाटले पाएको छ । ३२ प्रतिशत घटीमा ठेक्का लिएको उक्त कम्पनीले तोकिएकै समयमा निर्माण सम्पन्न गर्ने जनाएको छ । शव परीक्षण गर्ने र शव राख्ने छुट्टाछुट्टै कोठा हुनेछन् । शव नगनाउने फ्रिजरको व्यवस्था हुनेछ भने आधुनिक प्रविधिसमेत जडान गरी छिटोछरितो शव परीक्षण गर्ने गरी व्यवस्था मिलाइने अस्पतालले जनाएको छ ।  

पुरानो शवगृहमा शवको दुर्गन्ध कम गर्ने कुनै आधुनिक उपकरण नहुँदा लामो समयसम्म शव राख्दा त्यसको दुर्गन्धका कारण आसपासका बासिन्दाले सास्ती भोगिरहेका छन् । दुर्गन्धका कारण सर्वसाधारण नाक छोपेर हिँड्नुपर्ने अवस्था छ भने स्थानीय सवारी चालक, यात्रुदेखि व्यवसायीसमेत दुर्गन्धको चपेटामा छन् । 

गन्धकै कारण व्यवसायमा धक्का पुगेको र रोग फैलिन सक्ने स्थानीय व्यवसायीको गुनासो छ । स्थानीयवासीको मागलाई मध्यनजर गर्दै दुर्गन्ध नफैलिने आधुनिक शवगृह निर्माण थालिएको अस्पतालका अध्यक्ष शिवशङ्कर राय बताउनुहुन्छ । 

यस बिषयमा तपाइको प्रतिक्रिया...!