पहिरोले बाटो भत्काउँदा भुइँकटहर बजार पुर्याउन समस्या

Posted on: 07 Aug, 2020

साउन २३, नवलपुर । नवलपरासी (बर्दघाट–सुस्तापूर्व)को देवचुली–५ बन्दीपुरमा उत्पादन भएको भुइँकटहरलाई बजारसम्म पुर्याउन समस्या भएको छ । विगतका वर्षमा भन्दा यस वर्ष यहाँ भुइँकटरको उत्पादन बढी भए पनि बिक्री वितरणका लागि समस्या भएको छ । 

विगतका वर्षमा बन्दीपुरमा उत्पादित भुइँकटहर स्थानीय बजार दलदले, केउरेनी, कावासोती तथा नारायणगढसम्म पुर्याउने गरिएको भए पनि यस वर्ष भने पहिरोले बाटो भत्काउँदा उत्पादनलाई बजारसम्म लैजान अप्ठ्यारो भएको वडासदस्य पदम गाहाले गुनासो गर्नुभयो । साउन पहिलो साता भएको निरन्तरको वर्षाले गाउँबाट बजारसम्म जाने बाटो अवरुद्ध भएर जनजीवनमा व्यापक समस्या देखिएको उहाँले बताउनुभयो । 

“अप्ठ्यारो बाटो हुँदै टाउकामा भारी बोकेर हिँड्दा पनि कतै रुख ढलेर किचिन्छ कि भन्ने डर छ”, गाहाले भन्नुभयो, “कतिले त डोकोमा बोकेर फेदीसम्म पुर्याएपछि अटोरिक्सामा बजार लैजाने गरेका छन्, तर सबैले बोकेर लैजान सक्ने अवस्था छैन ।” प्रतिगोटा रु ४०/५० मा गाउँबाटै बिक्री हुने भुइँकटहरलाई बजारसम्म ल्याउन बाटो अवरुद्ध भएपछि कतिपयले डोकोमा बोकेर कदमपुरसम्म ल्याउने गरेका छन् । कदमपुरबाट अटोरिक्साको सहायताले बजार क्षेत्रमा भुइँकटहर पुर्याउँदा खर्चिलो हुने र आम्दानी पनि कम हुने बन्दीपुरका खेम अछामीले बताउनुभयो । 

गाउँमा प्रतिगोटा रु ४०/५० मा बिक्री हुने भुइँकटर स्थानीय बजारमा भने रु १०० सम्म बिक्री हुने गरेको छ । देवचुली नगरपालिकाको केउरानी हुँदै बन्दीपुर पुग्ने सडक पहिरोका कारण विभिन्न ठाउँमा अवरुद्ध भएको देवचुली–५ का वडाध्यक्ष शिव सापकोटाले बताउनुभयो । सडकमा गएको पहिरो हटाएर बन्दीपुरमा उत्पादित भुइँकटहरलाई बजारसम्म पु¥याउन पहल भइरहेको सापकोटाको भनाइ छ । 

सुगम जिल्ला भनेर चिनिने नवलपरासी (बर्दघाट–सुस्तापूर्व)को पहाडी गाउँ बन्दीपुरका बासिन्दालाई हरेक वर्षाको समयमा बाटोको कारणले समस्या उत्पन्न हुने गरेको छ । वर्षाका कारण सडक अवरुद्ध हुँदा कृषिजन्य सामग्री ढुवानीमा समस्या हुनुका साथै स्थानीय उत्पादनलाई बजारसम्म पुर्याउन कठिन हुने गरेको वडाध्यक्ष सापकोटाले बताउनुभयो । बन्दीपुरमा गाउँभरि नै व्यावसायिकरूपमा भुइँकटहर खेती हुने गरेको छ । देवचुलीको बन्दीपुर भुइँकटहरको पकेट क्षेत्रसमेत हो । रासस 

यस बिषयमा तपाइको प्रतिक्रिया...!