बजारमा कालोबजारी देख्नुभयो ? गृह मन्त्रालयको टोल फ्रि नम्बर ११४९ मा फोन गर्नुहोस्

Posted on: 26 Mar, 2020

चैत्र १३, काठमाडौं । गृह मन्त्रालयले लकडाउनको समयमा कालोबजारी, कृत्रिम अभाव सिर्जना गर्ने, जम्माखोरी जस्ता कार्यहरु गरी बजारमा आवश्यक उपभोग्य खाद्यवस्तुहरुको अभाव देखिएमा जानकारी दिन सर्वसाधारणमा अनुरोध गरेको छ । नागरिकलाई आवश्यक पर्ने दैनिक उपभोग्य खाद्य वस्तुहरुको आपूर्ति व्यवस्थालाई सहज बनाउनको लागि गृह सचिव महेश्‍वर न्यौपानेको अध्यक्षतामा आज बसेको बैठकले कालोबजारी रोक्न कुनै पनि शुल्क नलाग्ने र २४ सै घण्टा उठ्ने टोल फ्री नम्बर ११४९ मा फोन गरी सहयोग गरिदिन अनुरोध गरेको हो ।

मन्त्रालयले अहिलेको जटिल घडीमा कुनै समस्या परेमा त्यसको समाधानको लागि जानकारी दिन पनि अनुरोध गरेको छ । नेपाल सरकार (मन्त्रिपरिषद्‍) को मिति गत ९ गतेको निर्णय बमोजिम संक्रामक रोग ऐन, २०२० को दफा २  अनुसार ११ गते बिहान ६ बजे देखि लागु हुने गरी देशभर लकडाउन गरेको छ । उक्त आदेश बमोजिम विश्‍व्यापी रुपमा संक्रमण भइरहेको कोरोना भाइरसबाट आफु सुरक्षित हुन र अरुलाई पनि सुरक्षित बनाउन सबै नागरिकहरुले आफ्नो आफ्नो स्थानबाट नागरिक कर्तव्य पूरा गर्न पनि अनुरोध गरेको छ ।

सबै नागरिकहरु अत्यावश्यक काम नपरी आफु पनि घरबाट बाहिर ननिस्कन र परिवारका सदस्य, साथीभाई, आफन्त, इष्टमित्र, छरछिमेकी लगायत चिनेजानेका सबैलाई घरभित्र नै रहनको लागि उत्प्रेरित गर्न गृह मन्त्रालयले अनुरोध गरेको छ । 

वैठकले गरेका निर्णयहरु 

१. काठमाण्डौं उपत्यका भित्र रहेका अत्यावश्यक खाद्य वस्तुका सबै स्टोर एवं विक्रेताहरुले आ-आफ्ना डेलिभरी भ्यान मार्फत आवश्यक दैनिक उपभोग्य वस्तुहरुको सहज आपूर्तिको व्यवस्था मिलाउने ।

२. आवश्यक पर्ने डेलिभरी भ्यानहरुलाई सवारी पासको व्यवस्था सम्बन्धित जिल्ला प्रशासन कार्यालयहरुले मिलाउने।

३. पसलहरु संचालन, माग संकलन र वितरण गर्ने कार्यमा आवश्यक पर्ने सुरक्षा व्यवस्था महानगरीय प्रहरी कार्यालयले मिलाउने ।

४. माग संकलन र वितरण गर्ने कार्यलाई सहज र व्यवस्थित गर्नको लागि सबै स्टोर एवं विक्रेताहरुले आ-आफ्नो टोल फ्री नम्बर वा अन्य नम्बर उपलब्ध गराई प्रचार प्रसार गर्ने व्यवस्था मिलाउने । फोन, अनलाइन, अफलाइन मार्फत माग संकलन गरी माग भएका आवश्यक दैनिक उपभोग्य वस्तुहरुको (कम्बो प्याक समेत) विक्रिवितरण गर्ने ।

५. दैनिक उपभोग्य वस्तुहरुको आपूर्ति व्यवस्थापनलाई सहज गर्न गराउनको लागि सबै वडा कार्यालयहरुबाट आवश्यक सहजीकरण गर्ने गराउने व्यवस्था काठमाण्डौं महानगरपालिका र सम्बन्धित उपमहानगरपालिका/नगरपालिकाहरुले मिलाउने ।

६. काठमाण्डौं उपत्यका बाहिर रहेका अत्यावश्यक वस्तुका स्टोर एवं विक्रेताहरुले पनि उपरोक्तानुसारको व्यवस्था मिलाई आपूर्ति व्यवस्थापनलाई सहज बनाउने र यस कार्यमा सम्बन्धित जिल्ला प्रशासन कार्यालय र स्थानीय तहहरुले सहयोग गर्ने ।

७. यस जटिल घडीमा कुनै समस्या परेमा त्यसको समाधानको लागि तथा कालोबजारी, कृत्रिम अभाव सिर्जना गर्ने, जम्माखोरी जस्ता कार्यहरु गरी बजारमा आवश्यक उपभोग्य खाद्यवस्तुहरुको अभाव देखिएमा यस मन्त्रालयको कुनै पनि शुल्क नलाग्ने र २४ सै घण्टा उठ्ने टोल फ्री नम्बर ११४९ मा फोन गरी सहयोग गरिदिनु हुन अनुरोध छ ।


यस बिषयमा तपाइको प्रतिक्रिया...!