मगर समुदायको योगदान महत्वपूर्ण छ : सभापति देउवा

Posted on: 17 Apr, 2019

बैशाख ४, धनगढी । नेपाली काङ्ग्रेसका सभापति शेरबहादुर देउवाले नेपालको राजनीतिक परिवर्तनमा मगर समुदायको योगदान महत्वपूर्ण रहेको बताएका छन् । 

नेपाल मगर सङ्घको आज यहाँ शुरु भएको प्रदेशस्तरीय प्रशिक्षण कार्यक्रममा पूर्वप्रधानमन्त्री देउवाले पार्टीको संशोधित विधानअनुसार मगरलगायत सबै वर्ग र समुदायको उचित प्रतिनिधित्व गराउने गरी काङ्ग्रेस पार्टी अगाडि बढ्न लागेको बताए । 

प्रेस जगतमाथिको आक्रमण लोकतान्त्रिक व्यवस्थामाथिको आक्रमण भएको उल्लेख गर्दै देउवाले प्रेसमाथिको आक्रमण काङ्ग्रेसलाई सह्य नहुने उल्लेख गरे । 

उनले सरकारले पत्रकारितामाथि हस्तक्षेप गरेर निरङ्कुशता लाद्न खोजिरहेको आरोप लगाए । 

नेपाली काङ्ग्रेसका केन्द्रीय सदस्य एनपी साउदले वर्तमान सरकार आफ्नै गतिविधिका कारणले जनताका नजरमा असफल भइसकेको दाबी गरे । 

कार्यक्रममा काङ्ग्रेसका अर्का केन्द्रीय सदस्य रमेश लेखकले कार्यकर्तामा जागरण ल्याउनुपर्नेमा जोड दिए । दुईदिने सो प्रशिक्षणमा २०० प्रतिनिधि सहभागी रहेका छन् । 

यस बिषयमा तपाइको प्रतिक्रिया...!