चैत्र ७, काठमाडौं । अबदेखि केहि समयका लागि डिजिटल बैंकिङ कारोबार गर्दा शुल्क नलाग्ने भएको छ । कोरोना भाइरसबाट उत्पन्न हुनसक्ने संभावित जोखिम न्यूनकरण गर्न नेपाल बैंकर्स संघ, डेभलपमेन्ट बैंकर्स संघ र फाइनान्स कम्पनी एशोसिएशनले विज्ञप्ति जारि गर्दै डिजिटल बैंकिङ कारोबारमा शुल्क नलाग्ने व्यवस्था गरेको जनाएका छन् ।

अत्यावश्यक अवस्थामा बाहेक शाखामा नजानु हुन, भिडभाड कम गर्न तथा कोरोना संक्रमणबाट जोगिन/जोगाउनका निमित्त सहयोग गर्नका लागि ग्राहकहरुलाई अनुरोध गर्दै ग्राहकहरुलाई डिजिटल कारोबारमा सेवा शुल्क नलिने निर्णय गरिएको बैंकर्स संघले जनाएका छन् । साथै ग्राहकहरुलाई सकेसम्म बैंकमा नआउन आग्रह गरेका छन् ।

विश्वका धेरै देशहरु कोरोनाको संक्रमणले आक्रान्त भएको र विश्व स्वास्थ्य संगठनले पनि नेपाललाई जोखिमपूर्ण राष्ट्रको रुपमा उल्लेख गर्दै बैंकरहरुले ग्राहकलाई यस्तो अपिल गरेका हुन् ।

‘कोरोना सङ्क्रमण बढ्न सक्ने एक माध्यम बैंक नोटहरु पनि हुन सक्ने देखिएकोले सम्भब भएसम्म नोट कारोबारको सट्टा कार्ड तथा विद्युतिय कारोबारको माध्यम प्रयोग गर्नुहुन सबैमा अनुरोध गर्दछौं,’ तीनवटै संघद्वारा एकीकृत रुपमा जारी जारी विज्ञप्तीमा भनिएको छ ।

शाखाहरुमा भिडभाड कम गर्न तथा विद्युतिय कारोबारलाई प्रोत्साहन गर्न बैंक तथा वित्तीय संस्थाहरुले इन्टरनेट/मोबाइल लगायत विभिन्न विद्युतिय माध्यमवाट गरिने कारोवार, कुनै पनि बैंक तथा वित्तीय संस्थाको कार्ड नेपाल भित्र अन्य कुनै पनि बैंक तथा वित्तीय संस्थाको एटीएम प्रयोग गर्दा कुनै शुल्क नलिने जनाएका छन् ।

त्यसैगरी, नेपाल क्लियरिङ हाउसले प्रदान गर्ने कनेक्ट आइपिएस सेवामा कुनै शुल्क लाग्ने छैन । उपरोक्त सेवा/सुबिधाहरुमा शुल्क नलाग्ने व्यवस्था अर्को सूचना प्रकाशित नभएसम्मका लागि उपलब्ध हुने जनाइएको छ ।

‘इन्टरनेट/मोबाइल बैंकिङ्ग सेवा लिनु भएका ग्राहकहरुले आफ्नो पासवर्ड बिर्सिएमा वा अन्य कुनै प्राबिधिक समस्या भएमा आफ्नो सम्बन्धित शाखामा फोन मार्फत् सम्पर्क गर्नुहुन अनुरोध गर्दछौं,’ जारी विज्ञप्तीमा भनिएको छ ।

उपप्रधानमन्त्रीको संयोजकत्वमा गठित कोरोना रोग रोकथाम तथा नियन्त्रण उच्चस्तरीय समन्वय समितिको मिति २०७६/१२/०५ मा बसेको निर्णय अनुसार एकपटकमा २५ जना भन्दा बढी जम्मा नहुन, अत्यावश्यक काम बाहेक आवतजावत र हिँडडुल नगर्न, लगायत बिभिन्न निर्देशन दिइसकेको छ ।