ज्वालामुखी गाउँपालिकामा पहिलो होम स्टे सञ्चालनमा (फोटो फिचर)

Posted on: 26 Jan, 2020

माघ १२, काठमाडौँ | धादिङको ज्वालामुखी ५ खरी भदुवारमा पहिलो पटक होम स्टे संचालनमा आएको छ । 'भदुवार कालिका होम स्टे' नाममा संचालनमा आएको होम स्टेको सनिबार बिशेष कार्यक्रम सहित संघिय साँसद खेमप्रसाद लोहनी र संविधान सभा सभासद गुरु प्रसाद बुर्लाकोटीले उद्घाटन गरेका हुन् ।


आफ्नै घर-परिवेश जस्तै लाग्ने मगर गाउँको सफा वातावरणमा उनीहरुको संस्कार अनुसारको बसाईको साथै स्वच्छ वातावरणमा संचालित भएको उक्त होम स्टे आन्तरिक तथा वाह्य दुवै पर्यटकका लागि उत्तम गन्तव्य हुन सक्छ । हाल ९ घरबाट सुरु भएको होम स्टेको अवधारणा व्यवस्थित पार्दै लगिने होम स्टे व्यवस्थापन समितिले जनाएको छ । यो होम स्टे बिशेष गरि ग्रामिण परिवेशमा बस्न चाहने जो कोहिका लागि पनि उपयुक्त हुन सक्छ । निकट भविष्यमा राष्ट्रिय गौरवको आयोजना अन्तर्गत रहेको नेपालकै पहिलो जलाशययुक्त बुढी गण्डकी जलबिद्युत आयोजना अन्तर्गत ताल हेर्न जाने पर्यटकहरुको लागि पनि यो होम स्टे उपयुक्त बासस्थान हुन सक्छ । त्यस्तै गाउँमा स्थानीय उत्पादनका साथै स्थानीय कला र संस्कृतिमा रमाउनको लागि कालिका होम स्टे व्यवस्थापनले थप कार्ययोजना बनाईरहेको र छिट्टै होम स्टेमा आउने पाहुनाहरुको लागि संग्रहालय निर्माणको काम अगाडी बढाउने बताइएको छ । 

होमस्टे सेवा सुरु गरेपछि गाउँमा आउने पर्यटकहरूको संख्या बढ्ने र स्थानीय उत्पादन तथा कृषि उपजहरुको समेत उत्पादनमा स्थानीयहरुमा उत्साह बढ्ने विश्वास गरिएको छ । काठमाडौँबाट ६४ जिल्लालाई जोड्ने सडक नौविसे हुँदै मलेखुको पुलबाट १८ किलोमिटर पक्किबाटो हुँदै सदरमुकाम धादिङबेसी, त्यहाँबाट १५ किलोमिटरको दुरीमा ५ किलोमिटर पक्कि बाटो र १० किलोमिटर ग्रावेल बाटो हुँदै 'भदुवार कालिका होम स्टे' पुग्न सकिन्छ । 


होम स्टे रहेको स्थानबाट उत्तरमा रहेका दर्जनौं हिमालहरुको प्रत्यक्ष अवलोकन गर्न पाइन्छ भने बशन्त ऋतुसंगै नजिकैको बनमा फुलेका राताम्मे लालीगुराँस र बनमा आफैले काफल टिपेर खान पाइन्छ । जाडो तथा गर्मि दुवै मौषमका लागि 'भदुवार कालिका होम स्टे' उत्तिकै उपयुक्त छ । जाडोमा घाम ताप्नुको आनन्द र गर्मिमा हिमाल तिरबाट आउने चिसो वातावरणको आनन्दले यो होम स्टेको बसाईलाई थप आनन्ददायक बनाइदिन्छ । 


होम स्टेमा आउने पाहुनाहरूका लागि स्थानीय उत्पादनमा जोड दिदै साधेको गुन्द्रुक/भटमास, कोदो/मकैका परिकार, कोदो/चामलको सेल रोटि, स्थानीय घरमै पालिएका लोकल कुखुराको मासु, सुँगुरको मासु लगायतले स्वागत/सत्कार गरिने स्थानीयहरू बताउँछन् । त्यस्तै कालिका होम स्टेमा मगर खानाको साथै सोरठी, घाटु नाच लगायतका मगर संस्कृतिको मनोरञ्जन लिन सकिने होम स्टे व्यवस्थापकहरुले बताएका छन् । 


आज आइतबारबाट औपचारिक रुपमा सुरु गरिएको होम स्टेमा पाहुनाहरुको लागि छुट्टै कोठाहरु बनाईएको छ । सहर/बजारमा झैँ केहि घरमा टेलिभिजनको सुविधा पनि छ भने सफाईउक्त बसाईको लागि उपयुक्त कोठा बनाइएका छन् । अहिले होम स्टेमा पुग्ने पाहुनाहरु एकपटकमा ३० जनासम्म बस्न सक्ने गरी व्यवस्थापन गरिएको र आवश्यक रहेमा थप पाहुनालाई पनि व्यवस्थापन गर्न सकिने स्थानीयले बताएका छन् । 



होम स्टे संचालन संगै जिल्लास्तरमा हुने गोष्ठी, सेमिनार र अन्तरक्रिया कार्यक्रमहरू समेत 'कालिका होम स्टे' मै होस् भन्ने हेतुले आवश्यक व्यवस्थापनका कार्ययोजना बनाइएको होम स्टेका अध्यक्ष जीतबहादुर आलेले बताए ।  उनले होम स्टेको लागि आवश्यक वातावरण मिलाउन स्थानीय निकायहरुको सहयोगको अपेक्षा रहेको बताए । गत वर्ष नै उद्घाटन गर्ने तयारीमा रहेपनि तयारी नपुगेको कारण नेपाल सरकारले जनवरी १ मा घोषणा गरेको भ्रमणवर्ष २०२० लाईनै लक्षित गरी होम स्टे संचालन गरिएको अध्यक्ष आलेले बताए ।  


कालिका होम स्टेमा बहुउद्देशीय सामुदायिक भवनसमेत बनाईएको छ । पाहुनाहरुको आवश्यकतालाई हेरेर संयुक्त रूपमा खाना खुवाउने तथा कार्यक्रम गर्ने योजना रहेको व्यवस्थापन समितिले जनाएको छ । सुन्दर तथा प्राकृतिक यस क्षेत्रको विकास तथा होमस्टे प्रवद्र्धनमार्फत स्थानीयवासीको जीविकोपार्जन तथा ग्रामीण पर्यटनको संभावनालाई बढाउन स्थानीय तथा प्रदेश सरकारले समेत विशेष नीति ल्याउनुपर्ने स्थानीयवासीले माग गरेका छन् । स्थानीयहरुले आफ्नो प्रयासलाई सफल बनाउनको लागि सम्बन्धित निकायहरुले सक्दो सहयोग गर्नुपर्ने धारणा राखेका छन् । स्थानीयहरुले होम स्टेमा पर्यटकहरु ल्याउनमा सहयोग भए आफूहरुले स्थानीय स्रोत साधनको प्रयोगबाट आफ्नो घरहरुमा आउने पाहुनाहरुलाई सन्तुष्ट बनाएर पठाउने बताएका छन् । 


होम स्टे उद्घाटन कार्यक्रमलाई सम्वोधन गर्दै ज्वालामुखि गाउँपालिकाका अध्यक्ष विनोदराज तिमल्सिनाले होम स्टे संचालनको लागि शुभकामना व्यक्त गरे । उनले होम स्टे संचालनमा तत्पर रहनेहरुलाई धन्यवाद दिंदै बाँकीले होम स्टे संचालनार्थ पर्यटकहरु भित्र्याउनमा सहयोग गर्नुपर्ने बताए । अध्यक्ष तिमल्सिनाले गाउँपालिकाको तर्फबाट होम स्टे संचालनलाई थप व्यवस्थित बनाउन गाउँपालिकाले थप सहयोग गर्ने प्रतिवद्धता व्यक्त गरे । कार्यक्रममा बोल्दै ट्रेकिङ एसोसीएसन 'टान'का अध्यक्ष खुमबहादुर सुवेदीले भदुवार कालिका होम स्टेलाई सफलताको शुभकामना दिंदै यसलाई टेवा दिन आफ्नो तत्परता रहने प्रतिबद्धता व्यक्त गरे । 

कार्यक्रमलाई सम्वोधन गर्दै संविधान सभाका सदस्य गुरुप्रसाद बुर्लाकोटीले होम स्टे सञ्चालन र यसको व्यवस्थापनका लागि सहयोग गर्ने प्रतिवद्धता व्यक्त गरे ।


त्यस्तै कार्यक्रममा प्रमुख अतिथिको रुपमा रहेका संघिय सांसद खेम लोहनीले खरी अति आकर्षक ठाउँ भएको सन्दर्भ जोड्दै सबै समुदाय मिलेर बनेको हुनाले यसको आफ्नै बिशेषता भएको बताए । उनले ठाउँ अनुसार गुरुङ, मगर, क्षेत्री/ब्राह्मण, नेवार वस्ती, तामाङ वस्ती, दलित वस्ती, कुमाल वस्ती मिलेर सिंगो खरी बनेको भन्दै जो कोहि पाउनाको लागि पनि खरीको बसाई खास बिशेष हुने बताए । उनले खरीको वातावरण बारे चर्चा गर्दै गर्मि र चिसो दुवै मौषमका लागि खरी उपयुक्त स्थान रहेकोले पर्यटकहरुलाई यहाँको बसाई मन पर्ने र उनीहरुकै कारण अरु धेरै पर्यटक होम स्टेमा बस्न आउने बताए । लोहनीले यही बर्ष सादभन्ज्याङसम्मको सडक कालोपत्रे हुने भन्दै केहि बर्षमा खरीसम्मकै बाटो पिच गरिने बताए । खरीको भविष्य उज्यालो रहेको बताउदै लोहनीले भदुवार कालिका होम स्टेलाई अर्को बर्ष सहयोग गर्ने प्रतिबद्धता व्यक्त गरे । 


थप तश्वीरहरु: 


यस बिषयमा तपाइको प्रतिक्रिया...!