वैशाख ५, रुकुमपूर्व (रासस) | रुकुमपूर्वमा पर्ने मध्यपहाडी लोकमार्गको १६ किलोमिटर सडकखण्ड कालोपत्र गरिँदैछ । यो सडक नै जिल्लाको सबैभन्दा पहिले कालोपत्र हुँदै गरेको सडक हो । चन्द्रा एण्ड वसन्त कन्स्ट्रक्सन कम्पनीले भुमे गाउँपालिका–३ किमुबोटदेखि भुमे–१ को तुपुवाङखोलासम्मको १६ किलोमिटर सडकखण्डमा कालोपत्रको काम धमाधम गरिरहेको छ । नालीसहित सडकलाई चौडा बनाउने काम सकिएपछि कालोपत्रको काम शुरु गरिएको कम्पनीले जनाएको छ । 

यस क्षेत्रमा माघदेखि जेठ महीनाको अन्तिमसम्म मात्र काम गर्न सहज हुने कन्स्ट्रक्सन कम्पनीका इञ्चार्ज विष्णुबहादुर रावतले बताउनुभयो । “वर्षायाममा पानी र हिउँदयाममा हिउँ र चिसोका कारण सडकको काम गर्न असहज भइदिन्छ”, कम्पनीका इञ्चार्ज रावतले भन्नुभयो, “वैशाख १ गतेदेखि शुरु गरिएको पहिलो चरणको कालोपत्र काम असार मसान्तभित्र सक्ने गरी दिनरात खटिरहेका छौँ ।” सर्वसाधारणको सुविधालाई ध्यानमा राखी उनीहरुको यात्रामा समस्या नआओस् भनेर सडकको एक भाग कालोपत्र गर्ने र अर्को भागमा सवारी साधन गुड्न दिने व्यवस्था मिलाइएको छ । 

त्यसैगरी कालोपत्र गरिएको भागमा सवारी साधन गुड्ने भएपछि फेरी अर्को भाग पनि त्यसरी नै कालोपत्र गरिने उहाँको भनाइ छ । उक्त सडकखण्ड कालोपत्रका लागि रु २८ करोड  बजेट विनियोजन गरिएको थियो । रुकुमपूर्व र पश्चिम गरी यी दुईवटा जिल्लामा मध्यपहाडी लोकमार्गको १ सय २३.५ किलोमिटर सडकखण्ड पर्दछ । दुवै जिल्लामा पर्ने उक्त सडकखण्डलाई आठ खण्डमा विभाजन गरेर स्तरोन्तिको काम भइरहेको छ ।

जिल्लामै पहिलोपटक सडक कालोपत्र हुँन लाग्दा जिल्लावासी खुशी भएका छन् । बर्खामा हिलो र हिउँदमा धुलो धुवाँबाट आजित भएका जिल्लावासी सडक कालोपत्र भएपछि उक्त समस्याबाट मुक्त हुने र यात्रामा सहज हुने भन्दै खुशी भएका हुन् । भुमे गाउँपालिका– ६ का तारक बुढाले भन्नुभयो, “खाल्डाखुल्डी परेको सडकमा झ्याकिँदै र बाटोमा हिलो भेटिएपछि गाडी हिलोमा गाडिन्छ भनेर भुइँमा झर्दै फेरि गाडी चढ्दै यात्रा गर्नुपर्ने बाध्यता अब हामी माँझबाट टर्ने भएको छ । चिल्लो बाटोमा आनन्दमय यात्रा गर्ने जिल्लावासीको रहर पूरा हुने भएको छ । सडक कालोपत्र भएपछि समय र पैसाको बचत हुने साथै व्यापार व्यवसायमा सहयोग पुग्ने भुमे गाउँपालिका अध्यक्ष रामसुर बुढामगरले बताउनुभयो । पक्की सडक बनेसँगै जिल्ला भित्रिने पर्यटकको सङ्ख्यामा वृद्धि हुने उहाँको भनाइ छ । उक्त मध्यपहाडी लोकमार्ग राष्ट्रिय गौरवको आयोजना हो ।