अछाममा वडाध्यक्षको हत्या अभियोग लागेका चार जनालाई जन्मकैद

Posted on: 24 Dec, 2020

पुस ९,अछाम ।अछामको पञ्चदेवल विनायक नगरपालिका–२ का वडाध्यक्ष पदमबहादुर धामीको हत्यामा संलग्न रहेका चार जनालाई जन्मकैदको फैसला गरिएको छ। 

जिल्ला न्यायाधीश नवीनकुमार जोशीको बुधबार बसेको इजलासले हत्यामा संलग्न भएका पञ्चदेवल विनायक नगरपालिका–२ का स्थानीयवासी प्रेमबहादुर धामी, जीवन धामी, रमेशबहादुर धामी र धर्मबहादुर धामीलाई जन्मकैदको फैसला सुनाएको अदालतका स्रेस्तेदार नारायण पौडेलले जानकारी दिए।

वडाध्यक्ष धामी विसं २०७६ माघ महिनाको २० गते राति भैंसी गोठमा मृत फेला परेका थिए। मृतक वडाध्यक्षका भाइ सुरतबहादुर धामीले स्थानीय नौ जनाले हत्या गरेको भन्दै उनीहरूका नाममा किटानी जोहेरी दिएपछि हत्यामा संलग्न रहेको आरोप लागेका अन्य पाँच जनाको कसूर नरहेको भन्दै अदालतले सफाइ दिएको छ भने चार जनालाई जन्मकैदको फैसला सुनाएको छ। 

मृतक धामी नेपाली कांग्रेसबाट वडाध्यक्षमा निर्वाचित थिए।रासस

यस बिषयमा तपाइको प्रतिक्रिया...!