जनताको गुनासो ‘सडक स्तरीय भएन’

Posted on: 24 Jul, 2018

साउन ८ बुधबारे ।  हालै निर्माण सम्पन्न भएको चारपाने–नारायण चोक– जयपुर सडक खण्ड स्तरीय ढंगले निर्माण नभएको स्थानीयले गुनासो गरेका छन् । निर्माण सम्पन्न भए लगत्तै सो सडक ठाउँठाउँमा भत्किएको बताउँदै स्थानीयले सम्बन्धित पक्षलाई जानकारी गराउने बताइरहँदा तत्काल सडकको कमसल तथा भत्किएको ठाउँमा मर्मत गरेको स्थानीयको दावी छ ।

मंगलबार उपभोक्ता हित संरक्षण मञ्चका प्रतिनिधीहरु स्थलगत अवलोकनका क्रममा जाँदा सर्वसाधारणले सो खाले गुनासो गरेको मञ्चका अध्यक्ष धरणीधर पोखरेलले बताएका छन् । सो टोलीले स्थलगत अवलोकनका क्रममा सो सडक खण्डको बुद्धशान्ति क्षेत्रको सडक अवलोकन गरेको थियो ।

अवलोकनको क्रममा सडकका केही ठाउँमा कमसल सामग्रीका कारण बाटो भत्किएको थियो । सो ठाउँका स्थानीय गणेशप्रसाद निरौला, अनन्त नारायण श्रेष्ठ, ठाकुरनारायण श्रेष्ठ, शकुन्तला भट्टराई, सिताराम गौतम, रामकुमार गौतम लगायतले सडक स्तरीय नभएको बताएका थिए । ‘सडक स्तरीय बनेको छैन– स्थानीय शकुन्तला भट्टराईले भनिन् ‘कालोपत्रे भएको केही दिनमा नै कालोपत्रे उक्किए पछि ठेकेदारहरु आएर हत्तपत्त उक्किएको ठाउँ मर्मत गरे ।’ त्यस्तै स्थानीय सिताराम गौतमले अहिले पनि सडकको अवस्था हर्ने हो भने केही ठाउँको कालोपत्रे हातले सहजै निकाल्न सकिन्छ बताए । उनले सो टोलीलाई सहजै हातले कालोपत्रे सडक उक्काएर पनि देखाए । स्थानीयले पटकपटक स्तरीय सडक नबनेको बारे धेरै तिर कुरा उठाए पनि कसैले सुनुवाई नगरेको  जानकारी दिए । सडकको स्तरीयताको बारे निर्माण कम्पनीलाई जानकारी गराउँदा झापाकै नमुना सडक बन्ने बताउँदै एक वर्ष भित्र विग्रिए बनाइदिने बताउने गरेको   जनाए ।


अवलोकनका लागि गएको टोलीले ठाउँठाउँमा सडक अवलोकन गर्दा आफूले प्रयोग गरेको मोटरसाइकल राखेको ठाउँमा मोटरसाइकलको स्टेनले समेत कालोपत्रे गरिएको सडक दबेको थियो । जसले सडकको अवस्था स्तरीय नभएको निक्यौल सो टोलीले लगाउँदै सम्बन्धित निकायमा लिखित जानकारी गराउने जनाएको छ । उपभोक्ता संरक्षण मञ्च बुद्धशान्तिका अध्यक्ष सहित सचिव बेदनिधी न्यौपाने, सहसचिव तिर्थराज पौड्याल, कोषाध्यक्ष देवकुमारी शेर्मा, सदस्य खडानन्द वाग्ले, मनोरथ तिवारी, लक्ष्मी सुवेदी लगायतको टोलीले सो सडकबारे जनगुनासो बढे पछि स्थलगत अवलोकन गरेको थियो । साथै सो टोलीले मंगलबारै बुद्धशान्ति २ को खतिवडा चोकबाट साविक बुधबारे ७ तिर जाने सडक खण्ड तथा आदर्श नमुना सामुदायिक वन बुद्धशान्तिको हाताभित्र लगाइएको विरुवा नर्सरीको पनि अवलोकन गरेको छ ।

यस बिषयमा तपाइको प्रतिक्रिया...!